يا بحر الشوق

شعر: منتهى قريش

 

يا بحر الشوق
يا ليل .. يا ارموش السهر
يا وحشه وقهر
بالله خبروني عن الغياب

بليا اسباب عافوني
وخلوني
على ابواب الأمل أرتاب

متى يردون
أنا ما نامت اعيوني
وايديني
يمر بيها الندم حسره
أصبرني ابـ صور ذكرى
واقول بكره
مثل ما راحوا احبابي
يردوا من المدى أحباب

واتانيهم
أنا والليل واحروفي
من خوفي
أفز اسمع صدى همسي
كلام ابواب

أحلم بالسما تمطر حبايبنا
ويجي باكر
ونفس الحلم يمرمرنا
سؤال يمر ويجرحنا
متى يردون؟
متى يا حلمنا الكذاب

فقدناهم
من راحوا
يمر بالبال طاريهم
نحاتيهم
على اغصان الوله تبكي
عصافير الحزن أسراب

وافتح للفرح شباك في صدري
وانا أدري
حنين يموت داخلها
يتوب من الهجر لكن
قلبي من الهوى ما تاب

حبايب لو يردوا لي
أحني بالفرح قلبي
وعلى دربي
رياحين اللقا أمشي وانثرها
واخلي من الورود اخضاب

ردوا يا حبايبنا
ردوا لو حلم عابر
أخاف باكر
يفرقنا بعد أكثر
ولا نقدر
من هـ الهم
الـ سرى في اعروقنا كـ الدم
نهرب أو نصك الباب

زر الذهاب إلى الأعلى

لإعلانك هنا ـ مربع

للتواصل مع الصحيفة
إرسال إلى واتساب
صحيفة صُبرة : https://www.sobranews.com